【學嘢喇】曬冧女絕技 袁偉豪勁過葉問

Vicky     2016-11-29     0     檢舉
【學嘢喇】曬冧女絕技 袁偉豪勁過葉問

袁偉豪BB,你好過份呀~啲女仲唔畀你溝曬?

無綫電視劇《城寨英雄》尋晚終於首播,劇中雲集多位打得之人,包括元秋及伍允龍等等,就知實有好多精彩嘅打鬥場面。而男主角陳展鵬亦為劇集苦練功夫,首集 一開波已經同猛虎埋身肉搏,之後仲施展真功夫,一拳打死老虎,認真睇得又打得!而另一男主角袁偉豪平日行斯文靚仔路線,以為佢只係識耍繡花拳?實則佢係打 到拳拳到肉,仲成功一個打十幾個,分分鐘勁過喺電影《葉問》一打十嘅「宇宙最強」甄子丹呀!

一打十爆埋牆

劇中飾演八極門 宗師嘅袁偉豪,為人正氣、鍾意鋤強扶弱,認真Man爆!其後講到佢為咗救人,不惜單挑十幾個壞人,以為佢以一敵眾實死硬?結果喺五分鐘內,兩三下手勢已經 KO人哋,個個都被佢打到嘔白泡咁濟,難怪網友都話袁偉豪勁過「葉問」啦!不過講到最厲害嗰招,不得不提袁偉豪展現無窮神力,一拳已經將其中一個壞人打到 飛埋牆度,之後仲打爆埋幅牆,睇到人嘩嘩聲!

【學嘢喇】曬冧女絕技 袁偉豪勁過葉問

不過好可惜,大家要睇住圖先,因為呢幕未出現!

【學嘢喇】曬冧女絕技 袁偉豪勁過葉問

唔止胡定欣,小編隔住個Mon個下巴都跌到落地…

六嚿腹肌未出現

劇中另一精彩嘅打鬥場面,要數陳展鵬同袁偉豪表面敬酒捧杯, 暗地裏切搓功夫,仲互相用內功令對方手上嘅杯裂咗,網友們對呢幕讚口不絕,仲話睇得好過癮同熱血沸騰,不過,亦有網友表達不滿,皆因早前一個劇集預告,片中袁偉豪對住匿喺衣櫃嘅胡定欣玩「脫衣Show」,大方騷六嚿腹肌,連小編都睇到流曬口水,可惜最期待嘅呢一幕仲未播出,一班網友又要等等啦!

曬冧女金句

不 過唔緊要,可以睇住袁偉豪點冧女先!今晚播出嗰集,女主角胡定欣終於登場,其中佢因為牙痛而要睇牙醫,不過一開口就臭死企喺對面嘅袁偉豪,認真「慘慘 豬」!點知,袁偉豪毫不介意,仲大講冧女金句:「原來女仔唔同男人,流汗香,放屁香,就連口氣都香過人!」各位巴打,學嘢啦!

網民熱話:

XXXCHMAN:葉問先一個打十個,但袁偉豪就一個打十幾個,勁過葉問喎!

NAHXX_XONG:一拳打爆幅牆,肯肯定佢唔係人先咁大力。

KONJANXXX:個個都打得拳拳到肉,好耐無(冇)打得咁過癮既(嘅)電視劇啦!

XXFIXXA:最想睇袁偉豪bb六嚿腹肌,幾時先播呢幕???

【學嘢喇】曬冧女絕技 袁偉豪勁過葉問

跟住仲頂癮嘅係呢幕…