【開Turbo生BB】黎諾懿結婚兩年都未做老竇 38歲「嚴謹」驚好難陪仔踢波

BigBoysClubAisa     2016-11-10     0     檢舉

現年38歲、《愛‧回家》嘅「嚴謹」張達倫今日新婚之喜,佢喺深灣遊艇會筵開20席,迎娶拍拖兩年、貌似高圓圓嘅圈外女友陳鳳玲(Kimmy)!不過老婆就好怕羞,只有張達倫單獨做訪問,佢話:「佢做文職,唔識講嘢,怕見到大班人會嚇一嚇。」

張達倫透露同女友係青梅竹馬舊同學,年前撞番撻著咗,問到係咪要開turbo生BB?佢笑笑口話:「都想明年,哥哥今年生咗個女,如果我生仔,媽咪就會開心啲。因為自己都就快40歲,BB廿歲時我都60歲,好難陪佢踢波。」佢話見黎諾懿結婚兩年幾都未能造人成功,都有啲擔心,仲向已有一仔一女嘅徐榮請教,佢話:「徐榮教我飲醉酒好啲,不分日夜嘅,但今晚唔會不醉冇歸,怕出醜呀!」

新郎哥就搵咗《愛‧回家》嘅黎諾懿、徐榮、朱滙林、李霖恩等做兄弟,佢自爆早上接新娘時被迫穿上吹氣波衫,又要用腳指喺冰水上夾麻雀,問到開門利是?佢話:「好朋友在心中啦,大家玩得好開心。」